Giustia tar las pajas – er per las dunnas! Sajas sincer(a): Dessas

Giustia tar las pajas – er per las dunnas! Sajas sincer(a): Dessas

Giustia tar las pajas – er per las dunnas!
Sajas sincer(a): Dessas Vus main daners da giaglioffa a Vossa figlia che a Voss figl? Na sa
chapeschi per Vus betg da sasez che Voss figl e Vossa figlia survegnan – correspundentamain
a lur vegliadetgna – tuttina blers daners da giaglioffa? Jau admet che quai è en sasez ina
curiusa dumonda. Perquai che daners da giaglioffa èn daners da giaglioffa. Ed i na gioga
vairamain nagina rolla, sch'ils daners èn destinads per la figlia u per il figl.
Quai è totalmain different en il mund da lavur. Qua gioghi fitg bain ina rolla, sch'il salari va ad ina
dunna u ad in um. Betg en tut las branschas, betg en tut las relaziuns da lavur, ma en blers
quints da salari datti divergenzas. Las dunnas survegnan tar nus en Svizra en media bundant in
tschintgavel damain paja ch'ils umens – e quai cun ina prestaziun da lavur equivalenta. In um
svizzer gudogna en media quasi 7200 francs per mais, ina Svizra stgars 5500 francs per mais.
I dat bleras decleraziuns per questas differenzas da salari massivas. Ils umens han dapli
experientscha professiunala, interrumpan main savens lur carriera professiunala ed èn (anc)
scolads meglier che las dunnas. Bler damain dunnas lavuran en posiziuns da cader; ellas han
main access a furmaziuns supplementaras e sa qualifitgeschan uschia main che lur collegas.
Ultra da quai lavuran bleras dunnas a temp parzial ed en branschas da salaris bass.
Per part pon ins motivar uschia las differenzas da salari. Ma i resta ina part ch'ins na po betg
declerar. Uschia vegnan las dunnas per exempel effectivamain chastiadas tras la marida: En
media gudognan ellas 31 pertschient damain che lur collegas maridads. Ed uschia ston ins partir
dal fatg che mo e sulettamain il fatg che "esser dunna" e plinavant esser maridada è il motiv per
survegnir damain paja. Quai na po, quai na dastga betg esser! Perquai ch'igl è scumandà en
Svizra da dischavantagiar en tala moda mo pervia da l'appartegnientscha ad in'autra schlattaina.
Dapi l'onn 1996 datti la lescha d'egualitad che permetta a las persunas dischavantagiadas
schizunt da purtar plant davant dretgira.
Questa via ha instradà avant paucs onns in'emploiada en funcziun directiva d'ina gronda
interpresa internaziunala en la Svizra franzosa. Durant onns ha ella gudagnà 27 pertschient
damain che ses collega en la medema posiziun. Ina dretgira ha sentenzià l'interpresa ad ina
gronda indemnisaziun. La dunna ha dal rest savì mo per cas dal salari bler pli aut da ses
collega.
Tar nus n'èsi betg usità da discurrer sur dal salari. Strusch ha insatgi il curaschi da dumandar
directamain: "Quant gudognas ti?" Gist questa dumonda fiss il med ideal per las dunnas da
chattar ora tut simplamain, sch'ellas gudognan tuttina bler sco lur collegas. Stgaffir transparenza
en quai che reguarda las pajas è fitg impurtant en quest connex. Jau vi encuraschar las dunnas
cun activitad da gudogn da far dumondas areguard la paja. E jau vi er las encuraschar da na
betg sa cuntentar cun mesas respostas. Dunnas che han in suspect motivà da discriminaziun da
pajas han en noss chantun la pussaivladad da purtar plant da nov tar la cumissiun da mediaziun
a la dretgira districtuala da la Plessur. Ina cussegliaziun ed ina infurmaziun en moda
confidenziala porscha il post da stab per l'egualitad da las schanzas.
Ma er interpresas e manaschis èn obligads d'agir. E: Giustia tar las pajas è er in avantatg en la
concurrenza per bunas forzas da lavur!