pagina 2 (PDF 136kB)

SURSELVA
GLINDESDI, ILS 29 DA SCHANER 2007
3
Cantaduras e cantadurs
dall’entira Svizra ein
separticipai ad Europa
Cantat a Mustér.
Il chor hospitont
Cantus Firmus Surselva
cun Clau Scherrer fan
beinvegni en Surselva.
Puncts culminonts cun Rheinberger ed Anders Eby
La dieta dad Europa Cantat a Mustér ei stada in success ideal
DA GABY DEGONDA / ANR
■ La fin d’jamna vargada han buca
meins che 360 carschi, affons e giuvenils da differents chors dalla Svizra
frequentau a Mustér ateliers da cant e
cuors da diregier el rom digl inscunter
Europa Cantat. La claustra da Mustér
hagi ina buna olma e seigi in liug magic
per ina s’entupada da chors sco Europa
Cantat, ha Hansruedi Kämpfen, il president dalla Associaziun svizra Europa
Cantat, detg. «Cu jeu hai surpriu l’organisaziun hai jeu sutvaletau la dimensiun
d’in tal inscunter, ussa che tut ei gartegiau sundel jeu denton satisfatgs», di
Clau Scherrer, il president dil comite
d’organisaziun e dirigent dil Chor Cantus Firmus Surselva.
Beinvegni Surselva
Per visitar in atelier u l’auter hagi el buca giu peda. La part musicala ha el quella gada saviu surschar ad auters. Johannes
Meister ha menau igl atelier dil chor da
carschi per preparar la «Cantus Missae»
da Josef Gabriel Rheinberger per il survetsch divin dalla dumengia. Andreas
Wiedmer ha surpriu l’aventura cantica
cun 100 affons denter otg e dudisch onns
e Susanne Würmli-Kollhopp ha capiu da
motivar ils 80 giuvenils da 13 tochen 23
onns. Per l’instrucziun dil cuors da dirigents han ils organisaturs saviu engaschar il dirigent svedes Anders Eby. «El ei
ina corifea ed in dils megliers dirigents
da chors. Sia mudestadad e sia sempladad fascineschan mei», di Clau Scherrer.
Europa Cantat a Mustér ha entschiet
gia venderdis sera. Il chor da giuvenils da
Basilea da Susanne Würmli-Kollhopp ed
il chor hospitont han fatg beinvegni cun
entginas canzuns ed aschia lantschau cun
buna luna e slontsch la fin d’jamna da
cant.
Lu la sonda endamaun: El labirint da
corridors dalla claustra da Mustér regeva
in traffic sco sin ina staziun da tren d’in
marcau. Grazia als muossavias sempels
han denton tuts anflau lur stanza d’atelier.
Musica e svilup pils affons
Muort munconza da plaz ei il chor da
giuvenils vegnius dislocaus en sala Fontauna dil center da sport e cultura. Suenter in cuort cantar en cun sault e moviment ei il glatsch denter giuvenils e Susanne Würmli staus luaus. Denter ils
180 affons e giuvenils ch’ein separticipai
dils ateliers da cant sesanflavan era ils 80
commembers dils dus chors d’affons e
giuvenils dalla Scola da musica Surselva.
Malgrad che las cantaduras ed ils cantadurs da Rilana Cadruvi e da Astrid Alexandre havevan gia preparau bein las canzuns communablas, ha ei giu num
s’adattar ad in’autra dirigenta ed a novs
collegas da cant.
Las fatschas dils pli giuvens participonts han tradiu anim e plascher. Quei
era grazia alla dinamica dil versau dirigent Andreas Wiedmer. «Musica e moviment ein il pli impurtont per il svilup
d’in affon», declara il dirigent dil chor da
mattatschs «Sängerbuben» da Lucerna.
Direger 100 affons seigi ina sfida ed ina
buna experientscha per el. Ils affons e
giuvenils ch’ein separticipai dils ateliers
da cant derivan da tschun differents
chors dalla Scola da cant dil Valleis sura,
dil cantun Schaffusa, da Basilea e dalla
Surselva. Il concert final ch’els han dau
ier suentermiezdi en sala Cons ei staus in
dils punct culminonts da Europa Cantat 2007. Ton affons sco dirigents han
gudiu il liung applaus beinmeritau avon
che prender cumiau e serender a casa.
«Buna notg e dorma bain» ei franc ina
dallas pli derasadas canzuns romontschas
dalla Bassa. Per promover era autras canzuns dils numerus cumponists romontschs ha il Radio Rumantsch mess a
disposiziun portatuns sco era litteratura
davart ils cumponists indigens. Dirigents e cantadurs han fatg diever dalla
purschida, els ein gest stai alla fontauna
per empustar partituras e canzuns.
Punct culminonts ed il cumiau
«Buca muossa memia bia, lai ir la musica. Dai temps a tes mauns» di Anders
Eby a sia scolara Susanne Widmer. Ella sala pintga da concert regeva attenziun,
scadin moviment dil maestro ei vegnius
registraus. Sco chor da pilot ei il «Oberwalliser Vocalensemble» staus a disposiziun. Igl atelier da direger ella sala pintga
ei staus frequentaus bein. Profitau han
franc ils siat absolvents dil cuors ed era
ils aspectaturs sco Retus Giger da Surrein,
Andrea ed Umberto Camathias da Laax e
Cristina Riesch da Trin. «Sco dirigent fan
ins adina ils medems sbagls. Anders Eby
mira sur la schuiala, dat tips e curregia.
Era sco aspectatur hai jeu saviu profitar
dil cuors», di Umberto Camathias.
«In dils puncts culminonts ei stau la
participaziun da tons affons. Lur anim e
lur plascher da cantar tschaffa mei», di
Clau Scherrer. Il dirigent da Cantus Firmus Surselva trai generalmein ina bilanza fetg positiva ed animonta dalla scuntrada naziunala a Mustér.
Johannes Meister (seniester) ha dirigiu la Cantus Missae da Rheinberger ella baselgia
claustrala. Hansruedi Kämpfen ei il president dall’Associaziun svizra Europa Cantat.
Chors d’elita a Mustér. Ils chors «Molto Cantabile» ed igl «Oberwalliser Vocalensemble» han cantau ina canzun da cuminonza e proFOTOS G.DEGONDA
curau per «Standing Ovation».
Anreas Wiedmer: «La musica ei essenziala per il svilup digl affon.
Il dirigent svedes Anders Eby ha oravontut mussau ils moviments da direger. Susanne
Wiesner dad Aarau ha saviu profitar.
Las cantaduras dil chor hospitont han surpriu il servis.
Ils giuvenils ein arrivai ella
cuort dalla claustra. «Nus havein
fomaz, tgei dat ei bien?»
Ris Casimir per tuts!
Ei vegn tedlau e cantau canzuns romontschas.