Camartin Simon

Communicaziun allas medias
La canzun dil bau cun ritmus africans
Sera finala dalla retscha d’inscunters culla cultura africana
Tgei schabegia, sch’ins mischeida canzuns popularas romontschas cun
ritmus africans? Il Forum Cultural Internaziunal Mustér, sa buca tgei ed ughegia gest
perquei igl experiment. Da veser ed udir al davos inscunter culla cultura africana ils 6 da
settember 2014.
Mustér, 27-08-2014 -
Duront igl unviern vargau ha il Forum Cultural Internaziunal Mustér (FCIM) organisau treis
inscunters culla cultura africana. A Trun, Sedrun e Mustér han differentas persunas oriundas
dall’Africa sco era persunas ch’enconuschan entras lur engaschi bein l’Africa, raquintau
davart lur experientschas, respectivamein davart lur patria. Els discuors davart la cultura, il
lungatg e la cooperaziun al svilup, han denter auter Thomas Bearth (professer per
africanistica) e Roland Just (menader dalla gruppa da lavur Mbara Ozioma) dau ensemen cun
numerus hosps che derivan da l’Africa in’investa da quei vast continent.
Cultura indigena ed africana
Sco finiziun dalla retscha d’inscunters envida il FCIM ad ina sera culturala, nua che ton la
cultura indigena sco era la cultura africana dueien haver plaz. Aschia vegn l’Uniun da
harmonicas Cadi e la gruppa da musicists dil Senegal Saf Sap a sepresentar. Ferton che Saf
Sap presentan musica tradiziunala da lur patria, il Senegal , presenta l’Uniun da harmonicas
tocs ord lur repertori.
Cun la gruppa Saf Sap dat il forum era la pusseivladad a rodund 40 affons dalla Cadi
d’emprender en in luvratori da saltar e da sunar ritmus africans. Quei ch’els han empriu
muossan els medemamein alla sera culturala.
Il punct culminont: in experiment
Il punct culminont dalla sera ei la finala la presentaziun dad entginas canzuns popularas
romontschas cumbinadas cun elements dalla musica africana. La gruppa Saf Sap e l’Uniun da
harmonicas Cadi vegnan perquei era aunc rinforzadas d’in chor mischedau ad hoc diregius
da Gieri Spescha. Las formaziuns s’entaupan per ina suletta emprova communabla. Co quei
vegn a tunar, sa aunc negin e vegn ad esser ina surpresa ton pils cantadurs e musicists sin
tribuna sco era pil publicum. Ins sa dir ch’ei dat in ver inscunter dalla cultura indigena cun la
cultura africana. L’entrada ei gratuita, ei vegn priu si ina collecta e suenter las presentaziuns
dat ei ina stiva da caffè.
La gruppa Saf Sap vegn era ad embellir il survetsch divin ecumen campester dils 7 da
settember a Caischavedra. Quei ei sedau or dalla collavuraziun cun Roland Just ch’ei plevon
dalla pleiv reformada Cadi.
Per ulteriuras informaziuns:
Jacinta Jacomet, presidenta dil Forum cultural internaziunal Disentis/Mustér
telefon: 081 947 40 20
e-mail: [email protected]
internet: www.forum-disentis.ch